愛的水泡

因為寂寞 因為怕悶 因為佢追求 因為佢對我好
成為了我們一起的原因
但我想不起有沒有向他真心的說過一句‘我愛你’

我說過 以前拍拖對我來說是一個機會遊戲
時間人物地點 就係能夠在一起的criteria 
我single, 佢出現在我附近 令我們走在一起

老實說 我已記不起跟他一起的故事 沒有什麼很難忘
只記得每天都有個人接送 睡覺時有個人可以攬
日子就如常一天一天過去 後來我發現 18歲的我 不喜歡安穩日子
認識一些新朋友 開始LKF爛蒲生活 生活多姿多彩
最後 我認識了一個在澳洲的ABC 跟他分手
我寧願要一段不實在的long distance relationship 都不想跟他在一起

但分手後 沒有女朋友的義務 但我仍然要求有女朋友的權利
我是認真的自私 因為知道他還愛我 我便take advantage of him.
long D唔work out 一段接一段的short term relationship
每次的空檔期我就找他來陪我

當年 我天真得以為被愛是必然的
所有 都是以‘我’做出發點的 他要陪我因為我悶 他要對我好因為我習慣了他對我好
從頭到尾 我知自己自私任性 但都是怪他賦予我行使權利


肥仔 我不能跟你說我愛你 但我欠你一句對不起。
我知道你會是一個很好的老公 答應我 要跟未婚妻好好的生活

我的最愛

一直 我都以為我最愛係佢 

直到要recap一次 原來我唔睇返email, message及chat history 我根本就記唔起佢

時間 真係可以醫好所有傷口

五年前 經朋友介紹認識
當年25歲的佢 年青有為 做Investment bank 一個人住Caine Road 

佢鍾意煮野食 佢鍾意fashion design 佢鍾意做義工
佢鐘意用盡所有時間做佢自己鍾意的事 

佢愛我 但佢唔會將所有時間都俾晒我

就算我生日前夕 佢會選擇同朋友出去party 之後先同我慶祝

佢對我的愛 好像絢爛的彩虹 看起來很美麗

當年23歲的我 超任性 愈係得唔到 就想要得到愈多

我愛佢 我陪佢做所有佢鍾意做的事 我將整個自己俾晒佢

我對佢的愛 像倔強的荊棘

曾經 我成功將佢綁晌自己身邊 以為咁樣就係愛情

最後 我太用力去愛令佢窒息 一段感情 就咁枯死

中間的日子 

佢試過俾佢我電話佢新女朋友打黎鬧爆我

佢試過飲醉就打黎叫我上去佢屋企

佢同我講雖然唔可以一齊 但仲係好掛住我

我搵十萬個原因去繼續愛佢

同自己講因為佢都唔捨得 所以先會咁對我

同自己講真正的愛情要經歷一千個考驗

用左3年零8個月 我終於可以真真正正地放低佢

佢可能曾經愛過我 但佢更愛自己

錯的時間遇上對的人 5年後 我地再講返野 默契還在 感覺親厚
如果當年我地成熟一點 佢照顧多一點我感受 我給他多一點自由
唔知而加我地又會點呢?

Daaaaah, 多謝你給我最痛最絕望的日子 現在的我 沒什麼捱不過了.

Baaaaah :P

謝謝你來過

自從上次再撞返你 跟你一起的片段就好似舊電影重播一樣

記得你問我 點解唔可以珍惜一起的時間 唔可以嬲小陣 要你氹小陣
我答你 因為時間還有很多 我鍾意嬲因為我鍾意你氹
一轉眼 已經七年了

初相識的時候 見左你已經幾次 但你無一次記得我個名
名都記唔到 我點會諗到你會鍾意我
仲係SMS年代 一個月可以同你send到差不多3000個SMS
第一次dating 黑色波子接送 我仲以為自己發緊夢
每次見面 你都會帶給我很多驚喜
有次 你買左一條Dior的頸鍊給我 我收到的時候喊唔停
唔係感動唔係開心 係我嬲你仲乜可以揀一條我最唔鍾意的俾我 仲鬧爆你唔了解我.......
仲有次 我話天氣好好要食brunch曬太陽
結果 著住裇衫的你曬到出晒汗 仲被迫飲埋杯曬暖左的白酒.....

你為我做很多  物質 給我最好的 時間 給我最多的 愛情 給我最真的
之後 你亦成為左我搵男朋友的benchmark

我係一個好無自信的人 我唔相信幸福會晌我身上發生
每次我發脾氣 係要你remind我 你好愛我
我係一個好protective的人 就好似蜜蜂一樣
每次刺痛你 都理直氣壯說是為了保護自己
我係一個好敏感的人 一但你不在我身邊
我就會胡思亂想 傷心痛哭 自己給自己一場分手戲

2年，你的成熟讓我長大 令我變得更好
我跟你的相遇 相識 相知 相愛就好似搭地鐵
你在金鐘放我走 要我找一個比你更可以照顧我的人
兜了一圈 由紅色線轉到綠色線 又轉到藍色線跟你重遇
再遇 幸好像rush hour晌月台撞見趕時間的朋友 沒停下catch up
我怕你問我幾時結婚  我怕我令你失望 我仍然未找到那個會照顧我的人

再兜一轉 希望下次再見 我可以跟你說我找到幸福
謝謝你來過我的生命 跟我坐過幾個站
我期待 跟你再遇 回憶又可以重播一次




大豬 我終於明白 最美麗的不是結局。

前男友

我認識他那年 16歲 當時他只有17歲
同佢相處的日子唔長但好快樂  好快我地就無疾而終咁分開左.....
正確黎講 應該係當時我要2揀1，而我放棄左佢
一個好的一個壞的 16歲腦筍未生埋的我 當然要個壞架啦

雖然我地分開左 但呢個前男友 穿插住晌我過去十年的日子
每一次分手了 我第一時間會想起佢
奇怪係  每次佢都會盡量出黎陪我
每次走的時候我都會依依不捨 走了 我又會send個message話 "不如一齊返啦"
無幾耐 我又再拍拖 又無再聯絡
之後 又分手 又想起佢 又見面 我又會再問 "點解唔一齊返woh?"
如事者 好快我又再拍拖 我地又再一次失去聯絡


其實我有時都會諗 點解每次都想搵佢
咁多年 我同自己講佢係我最想要的人 因為佢從來都無拋下我唔理

最後一次見佢 係晌朋友的婚禮遇上
髮型改變了 留了鬍子 回想佢由一個男仔 變成咗一個男人
過去十年 我一直搵緊一個男人同我可以grow up & grow old together
原來  他一直都在

再一次失戀 但唔會再問佢同一個問題
佢注定係俾唔到我要的愛情給我
我終於明白 愛一個人係唔需要一齊
愛一個人只係想見到佢幸福快樂
愛一個人係當佢唔開心 借肩膊 有困難 幫佢擋子彈
多謝你 令我明白愛情 明白到 我地係唔會分開